శుభాన్షు శుక్లా రోదసీ యాత్ర మళ్లీ వాయిదా.. కొత్త తేదీ ఇదే!

• రేపు జరగాల్సిన ప్రయోగం జూన్ 22కు వాయిదా
• మరమ్మతులు, వాతావరణం, సిబ్బంది ఆరోగ్యం కారణాలుగా యాక్సియమ్ వెల్లడి
• ఏఎక్స్-4 మిషన్‌లో పైలట్‌గా శుక్లా.. ఐఎస్ఎస్‌కు ప్రయాణం
• పలుమార్లు వాయిదా పడుతూ వస్తున్న కీలక ప్రయోగం
• రాకేశ్‌ శర్మ తర్వాత చరిత్ర సృష్టించనున్న శుభాన్షు

భారత వ్యోమగామి శుభాన్షు శుక్లా చేపట్టనున్న ప్రతిష్ఠాత్మక అంతరిక్ష యాత్ర మరోసారి వాయిదా పడింది. ఈ మిషన్‌ను ఈ నెల‌ 19న నిర్వహించనున్నట్లు గత వారం ఇస్రో ప్రకటించిన సంగతి తెలిసిందే. అయితే, తాజా పరిణామాల నేపథ్యంలో ఈ ప్రయోగాన్ని జూన్ 22వ తేదీకి వాయిదా వేసినట్లు అమెరికాకు చెందిన ప్రైవేట్ అంతరిక్ష సంస్థ 'యాక్సియమ్ స్పేస్' అధికారికంగా ప్రకటించింది.

ఇటీవల చేపట్టిన మరమ్మతు పనులు, ప్రస్తుత వాతావరణ పరిస్థితులు, అలాగే సిబ్బంది ఆరోగ్య స్థితిని పరిగణనలోకి తీసుకుని ఈ నిర్ణయం తీసుకున్నట్లు యాక్సియమ్ స్పేస్ ఒక ప్రకటనలో పేర్కొంది. ఈ నేప‌థ్యంలోనే జూన్ 22ను ప్రయోగానికి తదుపరి అనుకూలమైన తేదీగా నిర్ధారించినట్లు సంస్థ వెల్లడించింది. అమెరికాలోని ఫ్లోరిడాలో ఉన్న నాసాకు చెందిన కెన్నెడీ స్పేస్ సెంటర్ నుంచి ఈ కీలక ప్రయోగం జరగనుంది.

'యాక్సియమ్ స్పేస్' చేపడుతున్న మానవ సహిత అంతరిక్ష ప్రయోగం ‘ఏఎక్స్-4’ మిషన్‌లో భాగంగా శుభాన్షు శుక్లాతో పాటు పోలండ్, హంగేరీ దేశాలకు చెందిన మరో ముగ్గురు వ్యోమగాములు అంతర్జాతీయ అంతరిక్ష కేంద్రానికి (ఐఎస్ఎస్) వెళ్లనున్నారు. స్పేస్‌ఎక్స్‌కు చెందిన ఫాల్కన్‌ 9 రాకెట్‌ ద్వారా వీరు నింగిలోకి దూసుకెళ్తారు. 

ఈ మిషన్‌లో భారత వ్యోమగామి శుభాన్షు శుక్లా పైలట్‌గా వ్యవహరించనుండటం విశేషం. ఈ ప్రయోగం విజయవంతమైతే ఒక ప్రైవేట్ రోదసి యాత్ర ద్వారా ఐఎస్ఎస్‌కు వెళ్లిన తొలి భారత వ్యోమగామిగా శుభాన్షు శుక్లా చరిత్ర సృష్టిస్తారు.

1984లో రాకేశ్‌ శర్మ రష్యా సహకారంతో అంతరిక్షయానం చేసి చరిత్ర సృష్టించారు. ఇప్పుడు సుదీర్ఘ విరామం తర్వాత శుభాన్షు శుక్లా ఈ ఘనతను అందుకోబోతున్నారు. నాసా సహకారంతో అంతర్జాతీయ అంతరిక్ష కేంద్రంలో శుక్లా పలు శాస్త్రీయ పరిశోధనలు కూడా చేయనున్నారు. ఈ యాత్రలో పైలట్‌గా పాల్గొనేందుకు తాను ఎంతో ఆసక్తిగా ఎదురుచూస్తున్నట్లు శుభాన్షు శుక్లా గతంలోనే తెలిపారు.

కాగా, ఈ ఏఎక్స్-4 ప్రయోగం సాంకేతిక కారణాల వల్ల ఇప్పటికే పలుమార్లు వాయిదా పడుతూ వస్తోంది. వాస్తవానికి మే 29నే ఈ ప్రయోగం జరగాల్సి ఉండగా, అది వాయిదా పడింది. ఆ తర్వాత జూన్ 8, జూన్ 10, జూన్ 11 తేదీలకు మార్చారు. జూన్ 11న జరగాల్సిన ప్రయోగానికి ముందు ఫాల్కన్‌-9 రాకెట్‌లో ద్రవరూప ఆక్సిజన్‌ లీకేజీని గుర్తించడంతో మరోసారి వాయిదా వేయాల్సి వచ్చింది. లీకేజీకి సంబంధించిన మరమ్మతులు పూర్తిచేసేందుకు మరింత సమయం పడుతుందని అప్పట్లో స్పేస్‌ఎక్స్‌ ప్రకటించింది. అనంతరం జూన్ 19న ప్రయోగం ఉంటుందని ఇస్రో తెలిపినప్పటికీ, ఇప్పుడు తాజాగా జూన్ 22కు వాయిదా పడింది.